Музей беларускага кнігадрукавання

Музей беларускага кнігадрукавання размяшчаецца ў памяшканні былой Брацкай школы Полацкага Богаяўленскага манастыра, помніку архітэктуры XVIII ст.

Музей адчыніў свае дзверы для наведвальнікаў 8 верасня 1990 года пад час святкавання 500-годдзя з дня нараджэння беларускага і ўсходнеславянскага першадрукара, славутага палачаніна Францыска Скарыны. Мастацкае рашэнне экспазіцыі ажыццявілі мастакі С. Дмітрыеў і І. Куржалаў.

Музей прысвечаны кнізе ва ўсіх яе аспектах, пачынаючы ад першых рукапісных скруткаў да кнігі сучаснай, знаёміць наведвальнікаў з гісторыяй стварэння пісьменнасці, пісьмовых прыстасаванняў, кніжнай ілюстрацыі, паліграфіі. Ён з'яўляецца адзіным у краіне музеем такога тыпу.

Самую вялікую частку музейных экспанатаў складаюць кнігі: рукапісныя, старадрукаваныя, а таксама сучасныя выданні. Старадрукаваныя выданні прадстаўлены цікавымі і прыгожымі выданнямі кірылічнага і лацінскага шрыфтоў. Сярод іх такія рарытэты, як «Евангеліе вучыцельнае» (Вільна: Друкарня Мамонічаў, 1595), Іеранім Фалецкі «12 прамоў» (Венецыя: Выданне Альдаў, 1558), «Мінея обшая» (Масква, 1628) і інш. Сучасныя выданні прадстаўлены лепшымі кнігамі-лаўрэатамі конкурсаў «Мастацтва кнігі».

Для таго, каб зрабіць падарожжа ў часе і ўявіць сабе нялёгкі працэсс стварэння рукапісных кніг, у музеі створана майстэрня перапісчыка кніг — скрыпторый, дзе можна пабачыць заклапочанага манаха-перапісчыка з гусіным пяром у руках. А працэс стварэння першых друкаваных кніг добра ўяўляецца пасля наведвання рэканструяванай друкарні XVII–XVIII стст., дзе побач шчыруюць наборшчык і друкар. У музеі можна пабачыць інтэр'ер кабінета вучонага або пісьменніка XVII–XVIII стст, майстэрні мастака-афарміцеля, прыгожую мэблю мінулых стагоддзяў і шмат чаго іншага.

Пакінуць заяўку на экскурсійнае абслугоўванне можна ў экскурсійным аддзеле музея-запаведніка па тэл. +375 214 42-53-40 ці па электроннай пошце sophia.polotsk@museum.by